Quyidagilar O‘zbekiston Respublikasi Avtomobil yo‘llari davlat qo‘mitasining asosiy vazifalari va yo‘nalishlari hisoblanadi:

avtomobil yo‘llari sohasida yagona texnika siyosatini olib borish;

avtomobil yo‘llarini rivojlantirish davlat dasturlarini ishlab chiqish va amalga oshirish;

avtomobil yo‘llari tarmoqlarini rivojlantirish va takomillashtirish istiqbollarini belgilash;

avtomobil yo‘llarining xalqaro tranzit yo‘laklarini shakllantirish;

zamonaviy transport oqimi sharoitlarida avtomobil yo‘llaridan foydalanuvchilarning manfaatlarini hisobga olib, avtomobil yo‘llarini moliyalashtirish, loyihalashtirish, qurish, ta’mirlash va ulardan foydalanish masalalari kompleks hal etilishini ta’minlash hamda buyurtmachi xizmatining samarali faoliyatini tashkil etish;

avtomobil yo‘llarini qurish, rekonstruksiya qilish, ta’mirlash va saqlash sifati ustidan nazoratni amalga oshirish;

xo‘jaliklararo qishloq avtomobil yo‘llarining, shaharlar, shahar posyolkalari, qishloqlar va ovullar ko‘chalarining mavjud tarmog‘i saqlanishini ta’minlash ishlarini muvofiqlashtirish, ularning yuqori transport-foydalanish darajasida bo‘lishini ta’minlash;

ilmiy-tadqiqot ishlarini tashkil etish, avtomobil yo‘llarini loyihalashtirish, qurish, rekonstruksiya qilish, ta’mirlash va saqlash sohasida innovatsion texnologiyalar va zamonaviy standartlarni joriy etish;

avtomobil yo‘llari sohasida kadrlarni tayyorlash, qayta tayyorlash va ularning malakasini oshirishni, shu jumladan, chet ellarda o‘quv-amaliyot kurslari va seminarlar tashkil etish.

Quyidagilar Agentlikning asosiy vazifalari hisoblanadi:

havo hududidan foydalanuvchilarning O‘zbekiston Respublikasi havo hududidan xavfsiz foydalanishlari, parvozlar insonlar sog‘lig‘i va hayotiga, atrof-muhitga hamda davlat manfaatlariga xavf solmagan holda amalga oshirilishini ta’minlash, o‘z vakolatlari doirasida havoda harakatlanishga xizmat ko‘rsatish tashkil etilishini va O‘zbekiston Respublikasining havo hududidan foydalanishni nazorat qilish;

O‘zbekiston Respublikasi fuqaro aviatsiyasi va uning obyektlarining xavfsiz faoliyat ko‘rsatishini, shuningdek, aviatsiyani noqonuniy aralashish harakatlaridan himoya qilish choralarini amalga oshirish orqali havo kemalari yo‘lovchilari hamda ekipaj a’zolarining hayoti va sog‘lig‘i xavfsizligini ta’minlash;

parvozlar xavfsizligini ta’minlash bo‘yicha fuqaro aviatsiyasi faoliyati sohasidagi sertifikatlash ishlarini tashkil etish va ta’minlash;

fuqaro aviatsiyasi va eksperimental aviatsiya faoliyati sohasida davlat nazoratini olib borish;

xalqaro tashkilotlarda O‘zbekiston Respublikasi fuqaro aviatsiyasi manfaatlarini ifoda etish.

Agentlik o‘ziga yuklangan vazifalarga muvofiq quyidagi funksiyalarni amalga oshiradi:

a) havo hududidan foydalanuvchilarning O‘zbekiston Respublikasi havo hududidan xavfsiz foydalanishlari, parvozlar insonlar sog‘lig‘i va hayotiga, atrof-muhitga hamda davlat manfaatlariga xavf solmagan holda amalga oshirilishini ta’minlash, o‘z vakolatlari doirasida havoda harakatlanishga xizmat ko‘rsatish tashkil etilishini va O‘zbekiston Respublikasining havo hududidan foydalanishni nazorat qilish sohasida:

fuqaro aviatsiyasi va eksperimental aviatsiya faoliyati sohasida Xalqaro fuqaro aviatsiyasi to‘g‘risidagi konvensiya (1944-yilgi Chikago konvensiyasi) va uning ilovalari talablariga asosan normativ-huquqiy hujjatlar loyihasini ishlab chiqadi;

fuqaro havo kemalari davlat reyestrini, fuqaro aviatsiyasining eksperimental havo kemalari va uchuvchisiz uchish apparatlarining hisobini yuritadi;

havo kemalaridan texnik va uchish maqsadida foydalanish hujjatlarini tasdiqlaydi;

fuqaro aviatsiyasi obyektlariga berilgan xorijiy sertifikatlarni, xorijiy davlatlar tomonidan aviatsiya mutaxassislariga berilgan sertifikatlarni (guvohnomalarni) e’tirof etishni ta’minlaydi;

xorijiy davlatlarning ekspluatantlari tomonidan O‘zbekiston Respublikasiga muntazam qatnovlar bajarilishi uchun ekspluatatsiya ruxsatnomalarini beradi va havo transporti orqali xavfli yuklar, qurol-yarog‘, harbiy texnika, harbiy mol-mulk, portlovchi moddalar va buyumlar, shuningdek, harbiy kontingentlar tranzitini amalga oshirishda vakolatli organlar uchun xulosalar tayyorlaydi;

havo kemalari ekspluatantlariga parvozlarni amalga oshirishlari uchun bir martalik ruxsatnomalar beradi;

parvozlar xavfsizligiga tahdid solishi mumkin bo‘lgan faoliyat turlarini amalga oshirish uchun ruxsatnomalar beradi;

O‘zbekiston Respublikasi fuqaro aviatsiyasi havo kemalari parvozlarining xavfsizligini ta’minlash davlat dasturini takomillashtirishni va amalga oshirishni quyidagi hujjatlarni berish bilan ta’minlaydi:

havo kemalari ekspluatantining sertifikati;

havo kemalariga texnik xizmat ko‘rsatuvchi tashkilotlar sertifikati;

fuqaro aviatsiyasi va eksperimental aviatsiya aerodromi, birgalikda foydalaniladigan (joylashgan) aerodromlar sertifikati;

O‘zbekiston Respublikasi fuqaro aviatsiyasi kadrlarini tayyorlash o‘quv markazining sertifikati;

fuqaro havo kemasi ro‘yxatdan o‘tkazilganligi to‘g‘risida guvohnoma;

fuqaro havo kemasi ro‘yxatdan chiqarilganligi to‘g‘risida guvohnoma;

eksperimental havo kemasi davlat hisobiga olingani to‘g‘risida guvohnoma;

fuqaro havo kemasining uchishga yaroqlilik sertifikati;

fuqaro havo kemalarining radio jihozlari sertifikati;

fuqaro havo kemalarining shovqin bo‘yicha sertifikati;

fuqaro aviatsiyasining tibbiy-uchish ekspert komissiyasini tayinlash to‘g‘risida guvohnoma;

fuqaro aviatsiyasining uchuvchisiz uchish apparatidan foydalanishga ruxsat to‘g‘risida xulosa;

kasbiy faoliyatini olib borishlari uchun aviatsiya xodimlari guvohnomasi;

ushbu kichik bandda ko‘rsatilgan hujjatlarning amal qilishini belgilangan tartibda to‘xtatib qo‘yadi;

b) O‘zbekiston Respublikasi fuqaro aviatsiyasi va uning obyektlarining xavfsiz faoliyat ko‘rsatishini, shuningdek, aviatsiyani noqonuniy aralashish harakatlaridan himoya qilish choralarini amalga oshirish orqali havo kemalari yo‘lovchilari hamda ekipaj a’zolarining hayoti va sog‘lig‘i xavfsizligini ta’minlash sohasida;

O‘zbekiston Respublikasida fuqaro aviatsiyasini noqonuniy aralashish harakatlaridan himoya qilishni ta’minlash davlat dasturini amalga oshirish va takomillashtirishni ta’minlaydi;

v) parvozlar xavfsizligini ta’minlash bo‘yicha fuqaro aviatsiyasi faoliyati sohasidagi sertifikatlash ishlarini tashkil etish va ta’minlash sohasida:

Quyidagilarni amalga oshiradi:

havo kemalari ekspluatantlarini sertifikatlaydi;

havo kemalariga texnik xizmat ko‘rsatish tashkilotlarini sertifikatlaydi;

fuqaro aviatsiyasi va eksperimental aviatsiya aerodromlarini, birgalikda foydalaniladigan (joylashgan) aerodromlarni sertifikatlaydi;

O‘zbekiston Respublikasi fuqaro aviatsiyasi kadrlarini tayyorlash o‘quv markazlarini sertifikatlaydi;

g) fuqaro aviatsiyasi va eksperimental aviatsiya faoliyati sohasida davlat nazoratini olib borishda quyidagilarga rioya etilishining davlat nazoratini tashkil etish va amalga oshirishni ta’minlaydi:

fuqaro havo kemalari va uchuvchisiz uchish apparatlari parvozlarini tashkil etish, ta’minlash va bajarish qoidalari;

fuqaro havo kemalaridan foydalanish va ularga texnik xizmat ko‘rsatish qoidalari;

fuqaro havo kemalarini ishlab chiqarish qoidalari (ulardan foydalanish jarayonida ushbu kemalarning parvozlari xavfsizligiga ta’sir qiluvchi ishlab chiqarish kamchiliklari aniqlangan taqdirda);

fuqaro aviatsiyasi va eksperimental aviatsiya aerodromlarini, birgalikda foydalaniladigan (joylashgan) aerodromlardan fuqaro havo kemalari parvozlari xavfsizligini ta’minlash bo‘yicha foydalanish qoidalari, shuningdek, yer ustidagi asbob-uskunalaridan foydalanish qoidalari;

fuqaro havo kemalarining parvozlari xavfsizligini va aviatsiya xavfsizligini ta’minlash sohasida aviatsiya xodimlarini tayyorlash qoidalari (shu jumladan, xodimlarni tekshirish va ularga ishlashiga ruxsat berish);

fuqaro havo kemalarining uchishga yaroqlilik normalari;

fuqaro aviatsiyasi va eksperimental aviatsiya aerodromlarining foydalanishga yaroqlilik normalari;

fuqaro aviatsiyasi va eksperimental aviatsiya xodimlarini tibbiy ko‘rikdan o‘tkazish qoidalari;

O‘zbekiston Respublikasi havo hududidan foydalanish va havoda harakatlanishni tashkil etish va xizmat ko‘rsatish qoidalari;

O‘zbekiston Respublikasi aviatsiya aloqa tizimlari va aeronavigatsiya vositalari ishonchli ishlashini ta’minlash qoidalari;

parvozlarni meteorologik ta’minlash qoidalari;

havo kemalari va maxsus transport vositalarining aerodrom perronida harakatlanishini boshqarish va tashkil etish qoidalari;

aerodrom ekspluatanti tomonidan havo kemalarining qush va yovvoyi hayvonlar bilan to‘qnashish holatlarining oldini olish tadbirlarini bajarish;

parvozlar xavfsizligiga tahdid solishi mumkin bo‘lgan faoliyatni amalga oshirish qoidalari;

parvozlar xavfsizligiga tahdid soluvchi obyektlarni belgilash qoidalari;

havo transportida yo‘lovchi, bagaj, yuk (xavfli yuk) va pochta tashish qoidalari;

fuqaro aviatsiyasining tegishli tashkilotlarida parvozlar xavfsizligini boshqarish tizimini joriy qilish va uning faoliyat ko‘rsatishi;

O‘zbekiston Respublikasiga fuqaro aviatsiyasining noqonuniy aralashish harakatlaridan aviatsiya xavfsizligini ta’minlash bo‘yicha normalari, qoidalari va tartibi;

parvozlarning qidiruv, avariya-qutqaruv ta’minoti qoidalari;

O‘zbekiston Respublikasiga parvozlarni amalga oshiruvchi xorijiy davlatlar ekspluatantlarining parvozlarni amalga oshirish qoidalari;

d) xalqaro tashkilotlarda O‘zbekiston Respublikasi fuqaro aviatsiyasi manfaatlarini ifoda etish sohasida:

parvozlar xavfsizligi va aviatsiya xavfsizligi sohasida O‘zbekiston Respublikasi imzolagan memorandumlarni amalga oshirish, standartlar va tavsiyalarni joriy qilish masalalari bo‘yicha Xalqaro fuqaro aviatsiyasi tashkiloti (IKAO) bilan hamkorlikni amalga oshirish;

Agentlik vakolatlariga kiritilgan masalalar bo‘yicha boshqa davlatlarning tegishli tashkilotlari bilan aloqalarni belgilangan tartibda amalga oshirish, o‘z vakolatiga tegishli bo‘lgan O‘zbekiston Respublikasining xalqaro shartnomalari bajarilishini ta’minlash;

parvozlar xavfsizligi va aviatsiya xavfsizligini ta’minlash masalalari bo‘yicha xalqaro tashkilotlar ishida, konferensiyalarda va seminarlarda ishtirok etish, normativ-huquqiy bazani, havo kemalaridan uchish va texnik foydalanish, havo navigatsiyasini, havoda harakatni tashkil qilish, fuqaro aviatsiyasi inspektorlari tarkibini tayyorlashni takomillashtirish.

Quyidagilar “O‘ztemiryo‘lnazorat” inspeksiyasining asosiy vazifalari hisoblanadi:

O‘zbekiston Respublikasi temir yo‘l transportida yuk va yo‘lovchilar tashish xavfsizligi ta’minlanishi yuzasidan davlat nazoratini amalga oshirish;

temir yo‘l transportida foydalaniladigan mahsulotlarning texnik jihatdan tartibga solish sohasidagi normativ hujjatlar talablariga muvofiqligi nazoratini amalga oshirish, shuningdek, ularni sertifikatlashdan o‘tkazishni tashkil etish;

temir yo‘llarda yuk va yo‘lovchilar tashish xavfsizligi sohasida hamkorlikni amalga oshirish va xalqaro tashkilotlarda Transport vazirligi manfaatlarini ifoda etish.

“O‘ztemiryo‘lnazorat” inspeksiyasi o‘ziga yuklangan vazifalarga muvofiq quyidagi funksiyalarni amalga oshiradi:

1) O‘zbekiston Respublikasi temir yo‘l transportida yuk va yo‘lovchilar tashish xavfsizligi ta’minlanishi yuzasidan davlat nazorati amalga oshirish sohasida:

umumiy foydalanishdagi temir yo‘l transportida va temir yo‘l transporti sohasida faoliyat yuritadigan yuridik shaxslarning shoxobcha yo‘llarida (keyingi o‘rinlarda temir yo‘l shoxobcha yo‘llari deb ataladi) yuk va yo‘lovchilar tashish xavfsizligini ta’minlash yuzasidan davlat nazoratini amalga oshiradi;

temir yo‘l transporti korxonalari va tashkilotlari tomonidan temir yo‘llarda yuk va yo‘lovchilar tashish xavfsizligini ta’minlashga, temir yo‘l transportining harakatlanuvchi tarkibi, texnik vositalarini saqlash, xizmat ko‘rsatish, ta’mirlash va ulardan foydalanishga oid normativ-huquqiy hujjatlar va texnik jihatdan tartibga solish sohasidagi normativ hujjatlar talablari ijrosini nazorat qiladi;

temir yo‘l transporti korxonalari va tashkilotlari tomonidan temir yo‘llarda poyezdlar harakati xavfsizligini ta’minlashga va temir yo‘lda tashishlar xavfsizligini ta’minlaydigan texnik vositalarning ishonchliligini oshirishga qaratilgan kompleks profilaktika chora-tadbirlari belgilangan muddatlarda bajarilishi yuzasidan davlat nazoratini ishlab chiqadi va amalga oshiradi;

temir yo‘l transporti obyektlari, mahsulotlari va texnologiyalarining belgilangan talablarga muvofiqligi yuzasidan ularni doimiy yoki vaqtincha foydalanishga qabul qilishda ishtirok etadi;

poyezdlar harakati xavfsizligi talablarini buzish holatlari bo‘yicha temir yo‘l transporti korxonalari va tashkilotlari tomonidan olib boriladigan xizmat tekshiruvlarining to‘g‘riligini nazorat qiladi (halokatga uchrash va avariyalar bundan mustasno);

temir yo‘l transporti korxona va tashkilotlari tomonidan poyezdlar harakati xavfsizligi qoidalarining buzilish holatlarini hisobga oladi va tahlil qiladi, shuningdek, temir yo‘llarda tashishlar xavfsizligi holati to‘g‘risida ularni xabardor qiladi;

umumiy foydalanishdagi temir yo‘l transporti korxonalari va tashkilotlarida qozonxona obyektlari, ko‘tarish inshootlari va o‘lchash tizimlarini saqlash, ulardan xavfsiz foydalanish bo‘yicha texnik jihatdan tartibga solish sohasidagi normativ-huquqiy hujjatlar va normativ hujjatlarga rioya etilishini nazorat qiladi;

temir yo‘l transporti korxonalari va tashkilotlari tomonidan temir yo‘llarda tashishlar xavfsizligini oshirish bo‘yicha tarmoq dasturlarining ijrosini nazorat qiladi;

temir yo‘l transportida tashishlar xavfsizligini ta’minlash, harakatlanuvchi tarkibni, temir yo‘l transportining texnik vositalarini saqlash, ularga xizmat ko‘rsatish, ta’mirlash va ulardan foydalanish bo‘yicha texnik jihatdan tartibga solish sohasidagi normativ-huquqiy hujjatlar hamda normativ hujjatlarni belgilangan tartibda ishlab chiqadi;

O‘zbekiston Respublikasi hududida harakat xavfsizligi talablarining buzilishi va ularning sabablari yuzasidan xizmat tekshiruvini o‘tkazish tasnifi hamda tartibi bo‘yicha normativ-huquqiy hujjatlarni belgilangan tartibda ishlab chiqadi;

umumiy foydalanishdagi temir yo‘l transportida poyezdlar harakati xavfsizligini texnik va texnologik nazorat qilishni ta’minlovchi umumiy foydalanishdagi temir yo‘l transportining tarkibiy bo‘linmalari faoliyatiga uslubiy yordam ko‘rsatadi;

nazorat funksiyalarini amalga oshirishda tadbirkorlik subyektlari, shuningdek, iste’molchilarning huquq va qonuniy manfaatlari ustuvorligi himoya qilinishini ta’minlaydi;

2) temir yo‘l transportida foydalaniladigan mahsulotlarning texnik jihatdan tartibga solish sohasidagi normativ hujjatlar talablariga muvofiqligini nazorat qilish, shuningdek, ularni sertifikatlashni tashkil etish sohasida:

temir yo‘l mahsulotining texnik jihatdan tartibga solish sohasidagi normativ hujjatlar talablariga muvofiqligini tasdiqlaydi, materiallar, detallar, uzellar va buyumlar sifati va xavfsizligi, shuningdek, texnik holati va qolgan resurslar to‘g‘risida ma’lumot olish maqsadida ularning parametrlari va ko‘rsatkichlarini belgilaydi;

temir yo‘l transportida foydalaniladigan va tayyorlovchi tomonidan keyinchalik sertifikatlash uchun buyurtma berilgan mahsulotlarning xavfsizlik va sifat ko‘rsatkichlarini texnik jihatdan tartibga solish bo‘yicha normativ hujjatlar talablariga muvofiq o‘rganadi va baholaydi;

respublikada olinib kelinadigan, ishlab chiqariladigan va foydalaniladigan temir yo‘l mahsulotlarining sinov bazasini va sertifikatlashni rivojlantirish va shu asosda muvofiqlikni baholash natijalarining davlatlararo darajada e’tirof etilishiga erishish choralarini ko‘radi;

temir yo‘l transportining harakatlanuvchi tarkibi va texnik vositalari uchun texnik jihatdan tartibga solish sohasiga oid normativ hujjatlarni belgilangan tartibda ishlab chiqadi;

temir yo‘l transporti obyektlarini ishlab chiqaruvchi, quruvchi va ulardan foydalanuvchi korxonalar va tashkilotlar faoliyatini ularda poyezdlarning xavfsiz harakatlanishini ta’minlash bo‘yicha texnik tekshirishni tashkil etadi va o‘tkazadi hamda ularga belgilangan tartibda muvofiqlik sertifikatini beradi;

3) temir yo‘llarda yuk va yo‘lovchilar tashish xavfsizligi sohasida hamkorlikni amalga oshirish va xalqaro tashkilotlarda Transport vazirligi manfaatlarini ifoda etish sohasida:

“O‘ztemiryo‘lnazorat” inspeksiyasining vakolatiga taalluqli masalalar yuzasidan boshqa davlatlarning tashkilotlari, tegishli organlari bilan belgilangan tartibda xalqaro hamkorlikni amalga oshiradi;

temir yo‘llarda tashishlar va mahsulotlar xavfsizligini ta’minlash, normativ-huquqiy bazani, temir yo‘llardan texnik jihatdan foydalanishni takomillashtirish masalalari yuzasidan xalqaro tashkilotlar ishida, konferensiyalar va seminarlarda ishtirok etadi;

“O‘ztemiryo‘lnazorat” inspeksiyasi o‘ziga yuklangan vazifa va funksiyalarni bevosita, shuningdek, hududiy filiallar va idoraviy mansub tashkilot orqali amalga oshiradi.

Quyidagilar “O‘zyo‘linspeksiya”ning asosiy vazifalari hisoblanadi:

yuridik va jismoniy shaxslar tomonidan avtomobil yo‘llari va sun’iy inshootlarni loyihalashtirish, qurish, rekonstruksiya qilish, ta’mirlash va saqlash, shuningdek, yo‘l-qurilish materiallari, buyumlari va konstruksiyalarini ishlab chiqarish sohasida texnik jihatdan tartibga solishga oid shaharsozlik to‘g‘risidagi qonun hujjatlari va normativ hujjatlar talablariga rioya etilishini nazorat qilish;

qurilishi tugallangan yo‘l obyektlarini foydalanishga qabul qilish komissiyalarining ishida ishtirok etish;

yo‘l qurilishi bo‘yicha shaharsozlik to‘g‘risidagi qonun hujjatlariga rioya etilishining nazoratini tashkil qilish sohasida texnik jihatdan tartibga solishga oid normativ hujjatlarni takomillashtirishga doir takliflar kiritish va unda ishtirok etish;

yo‘l-qurilish materiallari, buyumlari va konstruksiyalarni qonun hujjatlariga muvofiq standartlashtirish va sertifikatlashtirish ishlarini amalga oshirish;

avtomobil yo‘llaridan foydalanuvchilarning murojaatlariga asosan yo‘l obyektlarining sifat ko‘rsatkichlarini belgilash.

“O‘zyo‘linspeksiya” qonun hujjatlariga muvofiq boshqa vakolatlarni ham amalga oshirishi mumkin.

“O‘zyo‘linspeksiya” o‘ziga yuklangan vazifalarga muvofiq quyidagi funksiyalarni amalga oshiradi:

a) yuridik va jismoniy shaxslar tomonidan yo‘l qurilishi, yo‘l-qurilish materiallari, buyumlari va konstruksiyalarni ishlab chiqarish sohasida texnik jihatdan tartibga solishga oid normativ hujjatlar talablariga rioya etilishini nazorat qilish sohasida:

avtomobil yo‘llarini qurish, rekonstruksiya qilish va kapital ta’mirlash uchun loyiha hujjatlarida qabul qilingan texnik yechimlar, shuningdek, ularning ishlab chiqilishi sifatini nazorat qiladi;

yo‘l qurilishi jarayonida loyiha-smeta hujjatlariga kiritiladigan o‘zgarishlarning yo‘l qurilishi sohasida texnik jihatdan tartibga solishga oid normativ hujjatlar talablariga muvofiqligining nazoratini ta’minlaydi;

bajariladigan qurilish-montaj ishlarining sifati, ularning yo‘l qurilishi sohasida texnik jihatdan tartibga solishga oid normativ hujjatlar talablariga va loyiha-smeta hujjatlariga muvofiqligining nazoratini ta’minlaydi;

yo‘l qurilishi obyektida qo‘llaniladigan yo‘l-qurilish materiallari, buyumlari va konstruksiyalarini nazorat tartibida sinab ko‘radi, o‘lchaydi;

texnik va mualliflik nazorati, shuningdek, sinov yo‘l-qurilish laboratoriyalarining doimiy monitoringini olib boradi;

shaharsozlik to‘g‘risidagi qonun hujjatlari va yo‘l qurilishi, yo‘l-qurilish materiallari, buyumlari va konstruksiyalarini ishlab chiqarish sohasida texnik jihatdan tartibga solishga oid normativ hujjatlar talablari buzilganda ma’muriy ta’sir ko‘rsatish choralarini qo‘llaydi;

sifatsiz bajarilgan ishlar aniqlangan holatlarda, bajarilgan qurilish-montaj ishlarining hajmlarini bekor qilish uchun dalolatnoma tuzadi;

yo‘l sohasida faoliyat yuritish uchun berilgan litsenziyani to‘xtatib qo‘yish yoki amal qilishini bekor qilish to‘g‘risida vakolatli davlat organiga taklif kiritadi;

zarurat bo‘lganda, tegishli ruxsatnomasiz ishlarni bajarganlik va sifatini buzganlik uchun ma’muriy javobgarlikni qo‘llagan holda, muhandislik kommunikatsiyasi tarmoqlarini qurish va ta’mirlashda shahar ko‘chalari va boshqa aholi punktlarida yo‘l to‘shamasini buzish hamda qayta tiklash ishlarini nazorat qiladi;

avtomobil yo‘llaridagi sun’iy inshootlarning holatini nazorat qiladi;

mavjud avtomobil yo‘llarining diagnostikasini o‘tkazadi va avtomobil yo‘llarining transport-foydalanish ko‘rsatkichlarini baholaydi;

loyiha-smeta hujjatlarining sifatli ishlab chiqilganligini ekspertizadan o‘tkazadi;

avtomobil yo‘llarini ko‘rikdan o‘tkazadi, og‘ir va yirik o‘lchamli yuklarni tashish uchun yo‘nalishlarni belgilaydi va maxsus ruxsatnomalar beradi;

b) qurilishi tugallangan yo‘l obyektlarini foydalanishga qabul qilish komissiyalarining ishida ishtirok etish sohasida:

bajarilgan qurilish-montaj ishlarining tasdiqlangan loyiha-smeta hujjatlariga binoan to‘liqligi va sifatni, shuningdek, ish hajmlari qaydnomalariga mos kelishini o‘rganadi;

ijro hujjatlarining amaldagi normativ hujjatlarga mos kelishini o‘rganadi;

zarur hollarda, qo‘shimcha laboratoriya sinovlarini o‘tkazadi;

v) yo‘l qurilishi bo‘yicha shaharsozlik to‘g‘risidagi qonun hujjatlariga rioya etilishining nazoratini tashkil qilish sohasida texnik jihatdan tartibga solishga oid normativ hujjatlarni takomillashtirishga doir takliflar kiritish sohasida:

qayta ishlanishi va ishlab chiqilishi lozim bo‘lgan normativ-texnik hujjatlarning har yili tasdiqlanadigan ro‘yxatini kelishadi;

yo‘l qurilishi sohasidagi normativ-huquqiy hujjatlarning loyihalarini ishlab chiqadi va ishlab chiqilishida ishtirok etadi;

yo‘l qurilishi sohasida ishlab chiqilgan normativ-huquqiy hujjatlarning loyihalarini ko‘rib chiqadi va kelishadi;

yo‘l qurilishi bo‘yicha shaharsozlik to‘g‘risidagi qonun hujjatlariga rioya etilishining nazoratini tashkil qilish sohasida texnik jihatdan tartibga solishni takomillashtirish bo‘yicha takliflar kiritadi;

g) yo‘l-qurilish materiallari, buyumlari va konstruksiyalarni standartlashtirish va sertifikatlashtirish ishlarini amalga oshirish sohasida:

monitoring natijalarini tahlil qiladi, xalqaro tajribani o‘rganadi, yo‘l qurilishi sifati, shuningdek, yo‘l-qurilish materiallari, buyumlari va konstruksiyalaridan oqilona foydalanish masalalarini tartibga soluvchi metodik hujjatlarning normativ talablarini takomillashtirish bo‘yicha takliflar ishlab chiqadi;

“O‘zstandart” agentligi va Transport vazirligi huzuridagi Avtomobil yo‘llari qo‘mitasi bilan birgalikda O‘zbekiston Respublikasining hamda sifat bo‘yicha tan olingan xalqaro sertifikatlashtirish tashkilotlarining talablariga muvofiq yo‘l-qurilish materiallari, buyumlari va konstruksiyalarini standartlashtirish va sertifikatlashtirish ishlarini amalga oshiradi;

muvofiqlikni baholash organlari faoliyatida aniqlangan nomuvofiqliklar bo‘yicha “O‘zstandart” agentligiga takliflar kiritadi;

yo‘l-qurilish materiallari, buyumlari va konstruksiyalarini ishlab chiqarish sohasida texnik jihatdan tartibga solishga oid normativ hujjatlarning talablariga rioya etilishini nazorat qiladi;

yo‘l-qurilish materiallari, buyumlari va konstruksiyalari sifatini ta’minlash, yo‘l qurilishi sohasida texnik tartibga solish bo‘yicha shaharsozlik to‘g‘risidagi qonun hujjatlari va normativ hujjatlar talablariga rioya etish masalalari bo‘yicha boshqa vakolatli davlat organlari, ilmiy-tadqiqot, sinash, loyiha va nodavlat notijorat tashkilotlari bilan o‘zaro hamkorlik qiladi;

d) avtomobil yo‘llaridan foydalanuvchilarning murojaatlariga asosan yo‘l obyektlarining sifat ko‘rsatkichlarini belgilash sohasida:

manfaatdor tomonlarning vakillari ishtirokida jismoniy va yuridik shaxslarning murojaatlarini ko‘rib chiqadi, kamchiliklar aniqlanganda ularni bartaraf etish bo‘yicha ko‘rsatmalar beradi;

murojaatlarga binoan yo‘l obyektlarining sifat ko‘rsatkichlarini belgilaydi, zarur bo‘lganda, obyektlarni manzilli dasturlarga kiritish bo‘yicha tegishli vakolatli organga takliflar kiritadi;

e) faoliyatning boshqa masalalari bo‘yicha:

yo‘llar va sun’iy inshootlar, ularning qismlari va konstruktiv elementlarining avariya holati sabablarini tekshirish bo‘yicha texnik komissiyalar ishida qatnashadi;

yo‘l qurilishi sohasida davlat-xususiy sheriklikni rivojlantirishda ishtirok etadi;

shartnoma asosida yo‘l qurilishi sohasidagi loyiha hujjatlarini davlat ekspertizasidan o‘tkazadi;

shartnoma asosida laboratoriya sinovlarini o‘tkazadi;

shartnoma asosida mavjud yo‘llar va sun’iy inshootlarning texnik holatini tekshiradi, diagnostika qiladi;

shartnoma asosida yo‘l-qurilish materiallari, buyumlari va konstruksiyalarini sertifikatlashtirish ishlarini bajaradi;

qonun hujjatlari bilan taqiqlanmagan boshqa texnik xizmatlarni ko‘rsatadi.

Vazifasi:

Korxona o‘z vakolatlari doirasida samoviy hudud foydalanuvchilarining aeronavigatsiya xizmatlaridagi ehtiyojini qondirish, havo trassalari, mahalliy havo liniyalari, fuqaro aviatsiyasi hududlarida hamda O‘zbekiston Respublikasi hududi, shuningdek O‘zbekiston Respublikasi xalqaro shartnomalariga muvofiq boshqaruvi topshirilgan hududlar ustida javobgarligi doirasida aviatsiya ishlarini bajarish hududlarida xavfsiz, tejamkor va muntazam havo harakatini ta’minlaydi.

Faoliyat yo‘nalishlari:

- Majburiyat chegaralari doirasida havo kemalariga aeronavigatsiya xizmatlarini ko‘rsatish;

- Aloqa xizmatlari;

- Flayt-rejalarga ishlov berish xizmatlari (FPL);

- O‘zbekiston Respublikasi havo hududida uchuvchisiz uchish apparatlarini uchishiga arizalarga ishlov berish xizmati;

- Havo kemalarini kuzatish xizmatlari;

- Aeronavigatsiya axboroti hujjatlarini chop etish va foydalanuvchilarga taqdim etish xizmatlari;

- O‘zbekiston Respublikasi aeroportlarida maxsus tekshiruv texnika vositalariga xizmat ko‘rsatish;

- O‘zbekiston Respublikasi qonunlari bilan taqiqlanmagan boshqa faoliyat turlari.