Шаҳарлараро транспортни шаҳар транспорт тизими билан интеграциялаштирган ҳолда Тошкент транспорт узелида транспорт ҳаракатини яхшилаш мақсадида "Ўзбекистон темир йўллари" акциядорлик жамияти томонидан яқин келажакда янги ҳаракат таркиб (электричка)ларни сотиб олиш ва шаҳарлараро транспортида йўловчилар сонини кўпайтириш режалаштирилган.

Ҳозирги кунда, Хитой, Жанубий Корея, Белоруссия ва Россия Федерациясида ишлаб чиқарилган бу турдаги ҳаракат таркибларнинг техник хусусиятлари ва нарх сиёсати батафсил ўрганиб чиқилмоқда.

Таъкидлаш жоизки, туристик салоҳиятни янада ривожлантириш ҳамда маҳаллий ва хорижий сайёҳларга саёҳат қилиш учун қулай шарт-шароитлар яратишга қаратилган изчил амалга оширилаётган чора-тадбирлар қаторида Тошкент вилоятининг ноёб табиий ҳудудларига транспорт алоқаларини ташкил этиш ва сифатли хизмат кўрсатишни таъминлаш муҳим аҳамият касб этмоқда. Мисол тариқасида, Бўстонлиқ туманида жойлашган Тошкентдан Хожикентгача мавжуд йўналишдаги электропоездлар қатновига бўлган талаб йил сайин ортиб бормоқда. Маълумки, бунинг сабаби Бўстонлиқ туманида шаҳар четида жойлашган дам олиш манзил (дача)лар жойлашгани, сон-саноқсиз дам олиш масканлари ва санаторийларнинг мавжудлиги билан боғлиқ. Бугунги кунда ушбу йўналишда кунлик йўловчилар ташиш ҳажми қарийиб 2000 кишини ташкил қилади. Ҳар ҳафтанинг дам олиш кунлари ушбу йўналишдаги электропоездларнинг қатнаши жуда қулайлигини йўловчиларнинг ўзлари алоҳида таъкидлашмоқда.

Жумладан, пойтахт аҳолиси ва меҳмонлари ҳордиқ чиқариш вақтларини мазкур ҳудудда ўтказишни афзал кўришади. Шу муносабат билан ушбу йўналишдаги автомобиль йўлида кўп километрлик тирбандликлар вужудга келиб, қимматли вақтни сарф қилишга тўғри келмоқда. Бундай шароитда эса, электропоезд (электричка) нарх жиҳатидан ҳам, кам вақт сарфланиши билан ҳам ҳақиқатдан қулай транспорт воситаси ҳисобланади. Юқоридаги жиҳатларни ҳисобга олган ҳолда, “Ўзбекистон темир йўллари” АЖ мазкур йўналиш учун яна 4 та янги тезюрар электропоездларни ишга туширишни режалаштирмоқда. Бу эса, ўз навбатда Тошкентдан Хожикентгача ҳаракатланиш вақтини 2 соат 15 дақиқадан бир соатгача қисқартиришга, автомобиль йўлларидаги тирбандликни камайтиришга, кунлик йўловчилар ташиш ҳажмини 2000 дан 12000 гача оширишга ва темир йўл шаҳарлараро транспорт тизимининг ривожланишига олиб келади.

Ушбу жараёндаги ривожланиш тезлигига мос келадиган ҳаракатни ташкил этиш учун ҳозирги вақтда Тошкент – Ходжикент йўналишидаги темир йўл участкалари ҳам жадал суратлар билан модернизация қилинмоқда, капитал таъмирланмоқда. Бу йўсинда мавжуд ҳаракат таркиб (элекричка)лар ҳам модернизация қилинмоқда. Масалан, ҳозирда Тошкент ва Бекобод ўртасида ҳаракатланаётган электропоездда юмшоқ ўриндиқлар ўрнатилган, юк сақлаш жойлари кенгайтирилган.

Маълумки, ўтган йилнинг ёзидан Фарғона водийсидаги электрлаштирилган ҳалқа темир йўли Наманган – Андижон – Марғилон – Қўқон йўналишида электропоездлар ҳаракатлана бошлади. Ушбу минтақа мамлакатимизда аҳоли энг зич жойлашган ҳудуд ҳисобланади ва бу ерда кунлик йўловчи ташиш ҳажми 8200 кишини ташкил қилмоқда. Янги ҳаракат таркиблар сотиб олиниши биланоқ, Андижондан Хонободга ҳам электропоезд ҳаракатини йўлга қўйиш режалаштирилган.

"Ўзбекистон темир йўллари" АЖ Ахборот-таҳлилий медиа маркази